بدون إشعار ..

بدون إشعار ..

بدون إشعار ..ما أدري اشصار ..
القلب اختار .. والعقل احتار ..
كان الحب .. في إطار ..
وكان الود .. هو الأفكار ..

وفجأة .. بدون سابق إنذار ..
صار الحب .. بخار ..
وخف الود .. وطار ..
وصار الكلام .. في احتضار ..

ليش .. يا روح .. اشصار؟
ليش .. يا ولد الأخيار؟
جبار .. كلامك .. كسار ..
بلحظة دردم حبي بإصرار ..
لكم قلبي المسكين الغيّار ..
بنى حاجز من جدار ..
دمي في عروقي .. فار ..
حتى سد دموعي .. انهار ..

تحمل الضربة قلبي .. باصطبار ..
يالله .. يا رحيم .. يا جبار ..
اغفر لي وله .. زلات كبار ..
وزلات صغار ..
أدري إنه اختبار ..
ارحم حالي وحاله .. ياغفار ..

توقعت امتحان صعب القرار ..
ودخلت مجال كثير الأخطار ..
حبي له .. كان أحلى الأسرار ..
حب .. غيار ..
وشوق .. جرار ..
ووله .. بدون مقدار ..
كتبت له .. أحلى الأشعار ..
في ليالي السمار ..
بس كالعادة الزمان .. جار ..
ضربة من غير إخطار ..
هدت الجدار ..
وتهاوت الأحاسيس .. في أكبر انهيار ..
والدمع تدفق من عالي الأنهار ..

ضربة أوجعتني .. بمرار ..
ما دريت إن أدبي عندك بمقدار ..
كلامي عن نفسي .. صدق بار ..
وفكرتك عني تحرر وانحدار ..
وكلامي عنك .. تقدير بإصرار ..
وفكرتي عنك علو .. وانبهار ..
خجلت من نفسي .. المتعلقة بغبار ..
حسستني إني بالنسبة لك .. عار ..

ياولد الأحرار .. ما في إجبار ..
ولا رغبة في أعذار ..
عزيزة نفس .. حرقتها بنار ..
خلها تدواي حروقها الكبار ..
حُرة وأميرة .. من نسل الأبرار ..
من قلبها .. معزتك خذت .. أكبر مقدار ..
وللحين .. حايرة .. في الاختيار ..
وفاشلة في الاختبار ..
والله المستعان .. الغفار ..

بنت سيف
1/5/2009

يا نفس ..

يا نفس .. يا عزيزة ..
ليش رضيتي ..
يا نفس .. يا عزيزة ..
هنتي ونسيتي ..

نسيتي إن الإنسان كرامة ..
ونسيتي إن الاحترام مكانة ..
ونسيتي إن الكيان أمانة ..

ورضيتي إنج تنذلين ..
ولخاطر الغير .. تصبرين ..
قبلتي الوجع والأنين ..
وخانج الزمن ..
وقال لج .. تهونين ..

الألم راح .. وبقت المهانة ..
والجرح اندمل .. وراحت الأمانة ..

هنتي على نفسج .. يا نفس ..
وما أنتي غبية ..
نسيتي .. إنج أبيّة ..

صحيح الفكر له مكان ..
وصحيح العقل هو أمان ..
لكن القلب من صفات الإنسان ..

وأنتي قلبج رضى ينداس ..
من شخص واحد .. أعز الناس ..
كل شوي تقولين .. لا باس ..
هذا مب لولو .. هذا ماس ..

عزيزة نفس ..
دوسي على نفسج .. واصمدي ..
لا تفتكرين إن وجودج .. يهمه .. وارحلي ..

لكن الغرور .. مشكلة ..
والكبر معضلة ..
وكسر الخواطر .. مب مهزلة ..

يا انسان .. ياعزيز المكان ..
عزيزة نفس .. هجرها الأمان ..
ونفسها عييت .. فرص الزمان ..
وكسرت نفسها .. بيدها بإتقان ..

عزيز المكان ..
من فقد الشي .. ما يقدر يعطيه ..
وأنت معذور ..
عطيتني .. كل اللي تقدر عليه ..
وأنت مشكور ..
تبغي ترحل .. ارحل بطيبة ..
واترك النور ..

عزيزة نفس ..
يقول لج .. بأمانة ..
ما أنتي حبيبة ..
يقول لج .. بصراحة ..
أنتي غريبة ..
ارحلي .. ارحلي .. وابعدي ..
إذا ما فهمتي للحين ..
مصيبة ..

22/4/2009

عزيزة نفس

مشكلة مدونتي ..

مشكلة مدونتي ..

صار لي فترة ما دخلت المدونة بالتزام .. عندي ظروف شخصية ..
لكن من يومين .. كل ما أحاول انزل رد .. ما يفتح البوست عندي ..
الصراحة جنني ..
فسويت حفظ للمدونة على ملف .. ولغيتها كلية .. وبعدين رجعت .. نزلت البوستات .. عليها كأنها مدونة جديدة .. ومشى الحال .. لكن بعض البوستات نزلوا أكثر من مرة .. والبعض منكم يمكن لاحظ هالشيء .. لكن الحين حليت المشكلة ..
وعرفت سبب الخلل
البلوق كان يعلق عندي .. بسبب "الجاديت" الخاص بالزوار .. فلغيته .. وانحلت المشكلة ..

اعتذر منكم جميعاً .. على هذا الخلل الفني غير المقصود ..
عاد أنا فيني .. حالة كتابة .. والمدونة لعبت بحسبتي ..
وإن شاء الله من بكرة .. ستنهال البوستات

واسمحوا لي

تحياتي لكم جميعاً

عزيزة نفس

20/4/2009

حروف بين السطور ..

حروف بين السطور ..

من الولع والشوق .. قلبي خفق
زمان الود ماراح .. ولا بابي انصفق
مع الآه حس وحب .. في عقلي علق
روحي ونسمي وهواي .. معاك دوم لزق

ما في لحظة شوقي لك .. خف ولا عتق
خليت الروح تتأمل .. ومن الوجد حسي نطق
طيبة أخلاق ومعاني .. دانة مثلها ما انفلق
كامل الوصوف ياروح .. في كل شي لك حق

وجل واحترام صحيح .. لكل من على بابه يدق
الكلام عبر وحكم وذهب .. والنسم كله عبق ..
حروفي جمعها عزيز المكان .. واللي مثله ما انخلق

عزيزة نفس
بنت سيف
17/4/2009

العمرة ..

في الأسبوع الماضي رحنا العمرة .. مع الأهل لمدة أسبوع

والحمدلله كان الجو حلو والمكان جميل وزحمة .. ما توقعتها في هذا الوقت من السنة

شدهتني مناظر كثيرة داخل الحرم المكي .. مع العلم أني رحت العمرة كثير من قبل والحج ولله الحمد .. لكن الغريب إني كل مرة اتعلم شيء جديد ..

أكثر شيء شد انتباهي وتيرة سير المصلين في الطواف والسعي ..

وكذلك عند الآذان .. كيف يتدفق الناس للدخول في الحرم ..

الصورة التالية .. تبين الناس وهم في طريقهم للحرم لأداء صلاة الظهر .. عند باب الملك فهد ..

** ** **

والأهل .. هناك ما قصروا .. قاموا بالواجب وأكثر .. وهذي قصيدة كتبتها لهم في آخر يوم أشكرهم فيها على كل اللي سووه معانا ..

شكر وعرفان

واش جزا المعروف غير الشكران
وردود أفعال جميلة ..
لناس من غير هذا الزمان ..
قربهم وحبهم غنيمة ..
جمعوا ولمة من غير حسبان
بصدق نية وعزيمة ..
ركزوا همهم في خدمة الإخوان
وبينوا الود في صميمه ..
بسيطة كلماتي بس جد هي عرفان
لمشاعر في قلبي حميمة ..
تعبير لتقدير في جوف انسان
يحترم هداياكم الثمينة ..
عجيب كرمك يابو فلان ..
أنت الأصل في شميمة ..
كريمة ضيافتج يا أم فلان
أنتي للطيبة تميمة ..
الكلام فيكم ما هو بهتان
والكلام عنكم ماهو نميمة ..
قالت عنهم فلانة بنت فلان
وهي للحق دوم لزيمة ..

بنت سيف

عزيزة نفس ..

11/4/2009