لوحتي الجديدة ..

لوحتي الجديدة ..

استغرق رسمي لها أكثر من 3 أسابيع ..

ما رأيكم؟

بنت سيف

21/1/2010

فضضفة بداية السنة ..

الساعة الثانية صباحاً 1/1/2010 .. هطلت زخات من المطر ..

فاستبشرت بها .. جعلها سنة جديدة أفضل من التي سبقتها ..

كل عام وأنتم بخير وسلامة وستر وصحة ورضا ..

السالفة الأولى

الأسبوع الماضي رحت مجمع اللاند مارك .. ولما صارت صلاة المغرب .. دخلت المسجد أبغي أصلي .. وبالفعل بدأت الصلاة .. وكان في سيدة في المسجد .. متسندة على الطوفة .. وتتكلم بالموبايل بصوت عالي .. عاد أنا قلت .. أكيد مكالمة قصيرة وبتسكر .. وخاصة إن احنا في مكان صلاة .. والناس تصلي ..
بس لا .. الأخت مستمرة في الكلام - نظام هذرة - .. والله إني صليت المغرب والسنة .. وأنا مب مركزة عدل .. والسبب صوتها العالي ..
المهم .. بعد ما خلصت .. ما قدرت اسكت .. قلت :"هذا مكان صلاة .. مب مكان الواحد يسولف فيه في الموبايل .. تكلمي بره المسجد .. ما خليتنا .. نخشع واحنا نصلي" .. فتبرعت صديقتها بالرد التالي : "هذا مكان عام .. ومو من حقج تقولين لنا تكلموا بره؟" .. ما رديت عليها وطلعت من المسجد "مفوّرة" .. شرأيكم بالله ..!!؟

السالفة الثانية

مسجات الدعاية .. من كيوتل .. الصراحة تمللت .. كل شوي مسج من محل ما ندري عنه .. أول شي تهاني رأس السنة من يوم 30/12 -1/1 .. ما تم محل في الدوحة ما طرش للأمة تهاني .. مو مشكلة سنة جديدة وجزاهم الله خير .. ومن يوم 31/12 ابتدت مسجات التخفيضات .. سندارة أصلية .. حتى اللؤلؤة مطرشين مسجات .. يا كيوتل .. الرحمة زينة .. كرهتونا في المحلات .. إزعاج غير طبيعي ..

السالفة الثالثة

على طاري المسجات .. اليوم الصبح جاني مسيج من "مطراش" (وزارة الداخلية) .. يقول :"تم تسجيل مخالفة رادار بتاريخ 28/12 بقيمة 500 ريال السرعة المسجلة 96 كلم/الساعة .. " الصراحة مب متذكرة وين ارتكبت هذه المخالفة .. هم أكيد صح .. بس ضيقت خلقي المخالفة .. ليش ما يرسلون هالمسجات غير الطيبة إلا الصبح ..

السالفة الأخيرة

رحت معرض الكتاب أمس .. والمعرض مرتب ونظيف .. لكن صادتني خيبة أمل .. أغلب المعرض كتب معاد طبعها بأغلفة جديدة .. وتجليد فخم .. دورت على كتب جديدة أو روايات ..
واشتريت شوية روايات ..

رواية بديتها على طول .. عنوانها "في كل أسبوع .. يوم جمعة" لكاتب اسمه إبراهيم عبد المجيد (أول مرة اسمع عنه) .. اللي شدني للرواية إنها تتكلم عن العلاقات بين الناس على الانترنت .. والشخصيات الافتراضية .. الكتاب شكله ممتع .. بس ما اقدر احكم عليه للحين ..

وشريت رواية ثانية أغراني عنوانها .. "بنات نعش" لكاتبة اسمها لينا هويان الحسن .. من غلاف الكتاب فهمت إنها راوية عن البدو في 1880 .. مع إن بنات نعش هم مجموعة من النجوم اطلق عليها الخليجيون هذا الاسم ..

ورواية لكاتبة اسمها علوية صبح عنوانها "اسمه الغرام" اقترحت علي السيدة الواقفة بجواري إني اشتريها .. لفوز هذه الرواية بجائزة أدبية..

اكتفي بهالسوالف ..

واشوفكم على خير ..

بنت سيف
3/1/2010