خذ نسم .. قبل ما تتكلم

خذ نسم .. قبل ما تتكلم

خطة أو طريقة مهمة جداً .. علشان ما تتهور في الرد

من مزاياها .. إنها تعلمك الصبر و التأني و التفكير بهدوء وبعقلانية

ومن نتائجها .. أنها تخلي اللي يسمعك يطالعك بتقدير واحترام

::

هذه الطريقة بسيطة جداً

لأنها تطلب منك السكوت للحظة أو ثنتين وتاخذ نسم طويل وعميق .. بعدما يخلص اللي يكلمك كلام

وهي تتطلب منك إنك تتعود على جذيه

و في البداية .. يكون التنفيذ صعب وايد .. ولكن بسرعة يصير التعود عليه وترتاح معاه

لا والأحلى من هذا كله .. أنها تكسبك احترام اللي حواليك

::

 

في كثير من الأحيان .. يصير أن نتعرض لمواقف فيها انتقادات لك أو لأسلوبك أو لتصرف سويته

الرد الفوري .. بيخليك تغلط بسرعة .. ويمكن يعطي عنك فكرة سيئة .. ويجوز غير حقيقية عن شخصيتك

تأنى في الرد عن طريق أخذ نسم عميق .. حتى تقدر تتفاعل بهدوء في كل المواقف وخاصة المواقف اللي تستفزك ..

وتقدر تستخدم كلمات متوازنة في التعبير عن نفسك

::

 

ما عندي سالفة .. بس حسيت برغبة عنيفة في الكتابة ..

هذا اللي طلع معاي اليوم

 

عزيزة نفس
نور العيسى

22/9/2008