ما أعرف ..

ما أعرف ..

صار لي فترة أبغي اكتب ..
وأنا الناس اللي يحبون الكتابة ..
بس .. ما أعرف شاكتب عنه ..؟

أحس إن المواضيع استهلكت .. حتى الخواطر والمشاعر ..
والموجود على الساحة صار هموم وانتقادات ..
ومافي موضوع يخليني اندمج فيه ..

حتى إني ابغي اكتب في المدونة .. ومب قادرة ..
يا ترى هذي حالة عابرة .. ولا شنهو؟؟

صار عندي نوع من الصدة العنيفة مب بس عن الكتابة .. القراءة بعد ..
اشتريت كتاب من كم يوم .. وقلت بأقرا فيه ..
لكن لقيت أسلوب الكاتب .. صعب .. ويبغي لي قاموس .. علشان افهم فلسفته .. فتركته ..

من مشاكلي مع القراءة .. هي الخط الصغير ..
الخط الصغير صار يعصبني .. ولا في الجرايد .. والجرايد صارت مستهلكة ..
هذا .. هم .. كم عامود وكم كاتب .. وكل من يكتب همومه وشجونه .. اللي هي هموم مكررة بعد ..

فكرت عن بعض سوالفي .. يمكن تكون سخيفة في نظركم .. ويمكن لا ..

من سوالفي .. وأنا أسوق السيارة اطالع أرقم السيارات .. واعلق على رقم محدد عادة من الأرقام المئوية (461 ) مثلا .. وأشوف كم مرة يمر علي هذا الرقم في اليوم ..وأنا سايقة .. ايش الحكمة من هالحركة .. ما أدري والله ؟ لكن أسوي هالحركة لما أكون متمللة في المرور عند إشارة أو شارع مزدحم ..

بعد أحس إني كسولة وايد .. بس هالأيام عندي صداع عجيب ومستمر .. وأنا أدري إيش سببه .. لكن ما قاعد يروح حتى بالأدوية .. حالة نفسية يمكن ..
ومشكلة الحالة النفسية هي .. إني آكل شيكولاته وايد .. مع إنها مفيدة لأنها مضادة للأكسدة في الدم .. إلا إنها مضرة لأنها تزيد في وزني ..

أحد هواياتي هالأيام هي محاولة حل لعبة "سودوكو" (9×9) .. الصراحة اللعبة حلوة .. بس التركيز فيها يعور الرأس ..
ليكون هذا هو سبب الصداع .. ؟

فيني .. صدة عن النت .. أول كنت أحب ادخل وأقرأ وأشوف الجرايد والمجلات وأخبار الدنيا .. وادخل المدونات والمنتديات واشارك وأرد .. هاليومين .. ما عندي رغبة .. في النت ..

هذا كله ومب عارفة شاكتب ..
عيل لو أعرف .. شسويت ؟؟؟

حد مثلي .. ولا أنا بروحي أعاني من هالمشكلة .. وايش الحل ..؟؟

بنت سيف
27/6/2009