التكنولوجيا .. وأنا ..

التكنولوجيا .. وأنا
موضوعي قديم كتبته من سنين .. لكني حدثته اليوم .. بسبب التكنولوجيا .. وعالمنا الرقمي

الصراحة .. ما عندي مشكلة محددة مع التكنولوجيا

أول ما نزل الفيديو .. كجهاز .. كان شيء عجيب .. واللي يعرف يستخدمه .. كان عبقري ..

وبعدين توالت علينا .. المنتجات التكنولوجية .. إن كانت كاميرات ولا فيديوهات ولا كومبيوترات ولا موبايلات .. ولا برامج كومبيوتر .. و لا غيره ..

وصار اللي ما يعرف يستخدم التكنولوجيا .. أمي ( بمعني جاهل) .. وصرنا كل ما ينزل أحدث شيء في التكنولوجيا نستخدمه .. ونتعلم كيف نستخدمه .. لأن الحاجة لمواكبة العصر وضرورياته .. صار أمر مفروغ منه ..

وياريت الموضوع واقف على تعلم ما يسد اجتياجاتنا ...

صرنا نتعلم اللي محتاجين له واللي مب محتاجين له ..

لحد يقول كلمة جدامنا واحنا مب فاهمين .. ونطلع ما نعرف .. عيب

البعض يتعلم عن طريق مدرس والبعض يعلم نفسه بنفسه ..
وللتواكب مع الآخرين والحياة ..

تعلمت بنفسي استخدام بعض برامج الكومبيوتر مثل الباور بوبينت والفوتو شوب وكورال درو ..

و تعلمت كيف اركب برامج مختلفة على الكومبيوتر .. وتعلمت أشياء كثيرة في عالم الانترنت فقط ..

وبنفسي تعلمت يعني ايش بلوق .. بالعربي مدونة ..

وكثرت المواقع في النت اللي تقدم هالخدمة للأفراد مثل بلوقر وورد بريس ومكتوب .. وغيرهم ..

وسويت لي سبيس ولغيته لأن ماله داعي.
عالم المنتديات .. عالم مزدحم بالمواضيع والنقاشات الجادة وغير الجادة ..

والاشتراك في المنتديات صار شيء عادي للكثير من الناس ..
وعالم الإيميلات عن طريق الجروبات صار موجود بكثرة مزعجة ..

ومع ذلك كل يوم تزيد علينا البرامج والمواقع

والصرعة الجديدة هالأيام .. الفيس بوك .. اللي اعتبره وسيلة من وسائل السندارة الأصلية ..

طبعاً طريقة التسجيل في الفيس بوك سهلة .. لكن ما يسوي عليه الواحد يربط مع شخص يعرفه ولا مع الأهل ..

تقريباً تدخل عليك الدنيا كلها ..

هذا أنت تدخل من واحد لواحد هي صور وهي سوالف .. مفيدة وغير مفيدة .. وزحمة زايدة ..

وفي رأيي بدون لازمة
de activate سويت لاشتراكي فيه دي اكتفيت ..

الصراحة عجزت من اللوية فيه وزادت علينا التكنولوجيا في كل شي

Twitter وجانا الحين بعد تويتر

في حياتي المطبخية دخلت التكنولوجيا .. فصار هناك فرن الكتروني ووخلاط الكتروني ..

في الحمام دخلت التكنولوجيا .. حتى صار الدش الكتروني ..

وفي عالم الموبايلات .. معرفتي التكنولوجية تكفي لسد اجتياجاتي ..ما أبغي أعرف أكثر ..
و طلع لنا البلاك بيري .. وقمت تجهبذت وخذت لي واحد ..

لكن الصراحة استخدامه أحس إنه مافيه ذاك الزود .. عبارة عن كومبيوتر صغير ..
في الغرب البلاك بيري .. وسيلة اتصال مفيدة جداً للمواعيد والإيميلات المهمة وماشابه ..
في الشرق .. مهمة البلاك بيري الأولى هي "التشات" .. والهذرة ..
بس اقولكم .. تركته ورجعت لتلفوني العادي .. الجوال .. والسبب ..

ما أبغي رقبتي تطب من كثر ما هي منحية عليه ..
على فكرة .. كأني افكر – لاحظوا كلمة كأني – في الآي فون ..
وهذا حالنا .. كل شوي نتعلم تكنولوجيا جديدة ..

وطبعا لا تنسون .. التكنولوجيا في السيارة من كومبيوتر وخلافه ..

وكومبيوتر والجي بي إس .. بعد تكنولوجيا من نوع "الحنة الزايدة " ..

خل يخف الهوا في تاير السيارة .. يحشرك الكومبيوتر .. ضغط الهوا نازل كل شوي وتروح تعدله تلاقي اللي نازل شي بسيط

والجي بي إس .. إذا يتكلم .. يا عيني على وجع الراس

و لا البنك .. صارت معاملاتي تقريبا كلها من خلال موقع النت ..
ولا كيو تل .. ودفع الفواتير تكنولوجيا ..
حتى حجوزاتنا للسفر صارت عن طريق النت والتذاكر الإلكترونية ..
معاملاتنا صارت تكنولوجية في أغلبها ..

وأكثر شيء اليوم نشوف الأمور صارت الكترونية من مخالفات وفواتير وتجديد رخص .. إلخ .. كل هذا تكنولوجيا ..

وما في مشكلة مستفيدين محد ينكر ..

طيب ليش أنا متعذبه ؟؟

لأني أعاني من تقدم التكولوجيا ..

كل يوم شيء جديد ..

وكل يوم لازم اتعلم شيء جديد علشان اقدر اتواصل وأعيش مع اللي حوالي ..

طيب وبعدين ؟؟؟!!!!

ما عندي سالفة .. بس حبيت أفضفض

بنت سيف

19/3/2010