عشوائيات : الجزء الثاني

هذا الجزء الثاني .. من عشوائياتي

.. كتبتها بتواريخ مختلفة

هي عبارة عن سوالف صارت لي أو أفكار في ذهني

أم محمد

من فترة كنت في المول

وفجأة .. سمعت وحدة تزعق بقمة راسها ..

محمممممممممد..!!!!

تدرون وين .. جدام هايلاند .. وأنا تقريبا عند
كليرز ..Clair's ..

مشيت شوي باتجاه هايلاند

ولا وحدة لابسة عباية أنيقة وحلوة ..

تنادي ولدها محمد ..

ولا محمد مسكين ولد صغير بو سنتين أو ثلاث ..

خلونا .. من محمد ..

لكن .. اشرايكم في صرخة أم محمد اللي سمعوها وايد ناس ..

****

حب نفسك

أن تحب نفسك .. لا يعني أن تصبح أناني ..

ولكن يعني .. أن لا تسيء إليها أيضا ..

هناك مواقف .. في الحياة .. تتطلب منك أن تحب نفسك ..

ومواقف أخرى .. تتطلب الترفع فيها عن الإساءة للنفس ..

ماذا يعني ذلك؟

اترك لك أيها القاريء التفكير فيها .. لا التفسير ..

****

زيف المشاعر


قد يكون زيف المشاعر مؤلم .. عندما تصدق ما يقوله لك الآخرون

ولأن زيف المشاعر .. عملية خداع وكذب .. قد نفهم من أين يأتي الألم ..

ولكن عندما يكون صدق المشاعر والإحساس .. هما الألم .. كيف العمل؟؟

يبقى الإنسان يقدم .. وعليه أن لا ينتظر أي شيء .. في المقابل ..

بل عليه .. أن يخفض رأسه .. ويتقبل ما هو قادم ..

ماذا يصنع الفرد منا.. عندما تصدق مشاعره وأحاسيسه ..والآخرين لا يقدرونها ..!؟

الكثير يقول .. نقلب الصفحة .. ونضعهم طي الماضي ..

وأنا اقول .. لو كان بالإمكان .. لقلبنا الصفحة .. ولكن صدق المشاعر يمنعنا ..

****

خط يدي ..

الصراحة الكومبيوتر دمر خط يدي ..

اذكر إن خط يدي كان جميل .. وكنت خطاط الصف ..

اليوم خطي انا بروحي ما اقدر اقراه ..

بسبب قلة الممارسة ..

كتبت موضوع على ورقة بخط يدي ..

ولما جيت اطبعه .. ما عرفت أقرا بعض الكلمات اللي أنا كاتبتها ..

كارثة بجد .. من كثر ما استعمل الكي بورد لأغراض الكتابة .. نسيت كيف نكتب باليد ..

والنتيجة خط يدي صار عفسة ..

****

شنطة يدي

ما أدري ليش شنطة يدي صارت ثقيلة مرة واحدة ..

من حسن الحظ إن الموضة صارت شنط كبار

مع إني استخدم الحجم المتوسط

كل ما فتحت الشنطة ابغي استغني عن شي يخليها أخف .. ما اقدر

محفظة + نظارة قراءة + مفاتيح البيت+ معقم+"علوج"+ قلم +مفتاح السيارة+مناديل ورق+مشط+جوالي= محتويات شنطتي

خاطري اضيف دفتر التلفونات + نوتة +كولونيا ..

لكن وزن الشنطة ثقيل ..

هو ما عندي سالفة ..

لكن بالفعل .. ما اقدر استغني محتويات شنطتي .. وابغيها خفيفة بعد ..

****

يمين ولا شمال

ليش اللي جدامك في السيارة يلف بدون ما يعطيك إشارة يمين ولا شمال ..

وليش اللي جاي من بعيد بيلف في شارع على يمنيك .. وعلى شماله هو .. ما يعطي إشارة ..

لا حظت هالحركة .. اللي تقهر .. وهي ساعات خطرة .. على الغير ..

تعتقدون .. لغوا الإشارات يمين ولا شمال في مرور قطر.. وأنا ما أدري..!!

قاعدة افتكر ..

****

السكوت


السكوت لا يعني أنك لا تملك ما تقوله ..

بل يعني أنك تفكر فيما يجب أن تقوله ..

****

"زَيّ القمــر"

اتعجب من هالتشبيه ..

لما حد يوصف حد ثاني به ..

الحين القمر .. في حقيقته .. كويكب قاحل ..

رملي وصخر وما فيه حياة ..

طبعا له تأثير على الأرض .. من ناحية

السنة القمرية والمد والجزر .. والإضاءة ..

لكن .. لما أقول هالبنت حلوة "مثل القمر"

تشبيه غير واقعي ..

كل يوم اكتشفت عندنا استخدامات في اللغة عجيبة ..

****

تحياتي

بنت سيف