سوالف متفرقة

محمد بن همام .. اغتيال سمعة ..
قناعتي إن محمد بن همام بريء .. وإن دولة الفيفا .. حاربته لأنه بالفعل يشكل خطورة على عرشها ..
والمسألة هي الرغبة في إبعاد ابن همام خير شر .. وإن عرش الفيفا ما يطاله أي عربي..
تذكرت سالفة ديانا ودودي الفايد .. لما اغتالوها .. علشان احتمال تتزوج عربي ..
نفس السيناريو يتكرر بأشكال مختلفة في محاربة شرسة للعرب ..
احنا في قطر مجتمع صغير .. وأغلبنا يعرف كل فئات المجتمع وأخلاقياتهم ..
عمرنا في قطر ما سمعنا عن أسرة بن همام إلا كل خير ..
وهم ناس طول عمرهم في خير ونعمة .. وشرفاء بمعنى الكلمة ..
وما حدث لابن همام .. مكشوف وواضح .. والله يبريء ساحته أمام الجميع ..
أكثر شيء مزعلني ..
هو إخوانا الخليجيين .. ما تصورت هالقد شماته في النفوس ..
انصدمت بردود الفعل الفرحانة والشامتة فيه وفينا أهل قطر ..
لكن .. الدنيا ابتلاءات .. وموقف مثل هذا يوضح .. إن القلوب متفرقة ..
"لحد يفكر في كونفدرالية خليجية" .. لأن مشكلتنا في القلب ..
الله يسامحكم ياالشامتين ..
والله ينصرك يا بوجاسم ..
واحنا كلنا أهل قطر معاك .. ولا عندنا ذرة شك في براءتك ..

**
سور بيتنا ..
الأسبوع الماضي .. دعم شاب عمره 19 سنة سور بيتنا ..
كان مسرع .. وطاح الجوال من يده .. فحاول يلتقطه .. فاختل مساره عن الشارع ..
ودخل في السور .. سبب فجوة كبيرة حوالي 4 متر في العرض .. وشرخ في عرض السور بمسافة 15متر ..
الحمدلله هو ما تعوّر .. لكن سيارته .. تكنسلت ..
حسب تقرير الشرطة .. السيارة جديدة 2011 .. أبو الشاب شاريها له في شهر 2 الماضي ..
التأمين بيدفع ثمن التصليح ..
لكن شفتوا .. سلبية استخدام الجوال في السواقة ..

**
الرطوبة ..
بداية الصيف .. ولنهاية شهر 6/2011 .. الوضع كان محتمل جدا ..
صحيح الحرارة عالية .. لكن في هوا ..
مع بداية شهر 7 .. غزتنا الرطوبة ..
فحالنا .. ثاني حال ..
يوم حر وهوا .. وبدون مقدمات .. ما نوعي إلا الرطوبة .. طبت ..
وكتمت أنفاسنا ..
أتمنى الرطوبة .. تهجرنا في شهر رمضان ..

**
العبايات ..

سوق العبايات في ازدهار .. ولا يكترث بالأزمات الاقتصادية اللي يمر فيها الناس ..
عباياتي .. عادة ما فيها مبالغة في التطريز ولا الألوان .. ولا فناتك الزمان ..
كنت أسوي عباياتي في محل اتعامل معاه من سنين ..
في 2008 .. العباية مع الشيلة بدون مبالغات في التصميم .. تكلفني حوالي 450 ريال ..
في 2009 .. صارت تكلفني ما بين 600 إلى 800 ريال ..
في 2010 .. وصل السعر ما بين 700 إلى ألف ريال ..
والتصميم بسيط .. السنة صارت العباية تكلف ما بين 1200 ريال إلى 1800 ..
قفزة اقتصادية مروعة ..
والواحدة تحتاج عبايات .. في السنة الواحدة .. افصل مابين 5-7 عبايات ..
افكر اسوي لي محل عبايات ..

**

رمضان ..

رمضان على الأبواب ..
التجهيز لاستقبال رمضان .. مسلسل .. بنفسه ..
ولكن أتمنى إن ما يكون الإسراف عامل أساسي ..
سفرة رمضان .. أرجو أنها تكون منطقية .. وما فيها تبذير ..
أكثروا من الصدقات وقراءة القرآن والترحم على الأموات ..
كل عام وأنتو بخير .. ويعوده عليكم بالرضا والسعادة والخير ..


تحياتي
بنت سيف
24/7/2011