دوحة - نيويورك - دوحة :: الجزء الثاني

دوحة – نيويورك – دوحة :: الجزء الثاني

لقراءة دوحة – نيويورك – دوحة :: الجزء الأول

يرجى زيارة الرابط التالي

http://bintsaif1.blogspot.com/2010/03/blog-post_25.html

** ** **

الشهر الماضي .. قرروا الأهل زيارة نيويورك .. وطبعاً كالعادة رزيت ويهي ورحت معاهم ..
أول شيء كنت محتاجة أزور طبيب جراحة أعصاب لمشكلة الانزلاق الغضروفي اللي في ظهري ..
وثاني شي .. سفرة قصيرة وفسحة وتسوق وتغيير جو ..

هالمرة سكننا في فندق أحسن من المرة اللي فاتت .. لأن مافي ضغط على الفنادق مثل المرة اللي فاتت .. سكننا في فندق Rizt-Carlton – central Park ..
والحقيقة الفندق أكثر من رائع .. سواء في الغرف و الخصوصية والخدمات والحمامات ..
يعني فرق عن فندق السنة الماضية ..

السالفة اللي أبغي اسجلها لكم في هالرحلة .. تتعلق فيني ..
قبل ما تنزل الطيارة في مطار JFK في نيو يورك .. حسيت بجفاف في جلدي .. فقمت حطيت كريم على يدي .. ( الموضوع عادي .. لحد الحين)
عند الجوازات .. بعدما طلعنا من الطيارة ..

قال لي ضابط الجوازات حطي أصابعج اليمين على السكانر وبعد أصبعج اليمين ونفس الشي لليد الشمال ..
بعدها حط جوازي على صوب .. وسوى نفس الشيء لأهلي وختم جوازاتهم .. أنا ما ختم جوازي ..
رد حق جوازي وسألني .. هذي أنتي اللي في الصورة ؟؟؟!!
قلت نعم .. بس وزني كان أكثر فيها ..
قال .. بصماتج غير مطابقة .. تعالي معاي ؟؟؟؟
طبعاً .. ما اقول لكم عن الرعب اللي دخل فيني .. لكني ظليت متماسكة ..
وداني غرفة كبيرة يمكن فيها 50 كرسي .. وكونترات عالية عليها أربع ضباط .. من الحجم الثقيل ..
وفي المدخل فية ضابطة قاعدة على مكتب .. عطاها جوازي وقال روحي قعدي على كرسي لحد ما ينادونج ..
طبعا جلست على كرسي .. وسبعمائة مليون فكرة في راسي .. وتذكرت كريم اليد اللي حطيته على يدي قبا ما تنزل الطيارة ..
جلست حوالي 10 دقائق .. متخرعة طبعاً .. وظهري لمكتب الضابطة ..
ما وعيت إلا يد تطق على ظهري .. موظفة تقول لي .. تفضلي جوازج .. بصماتج مطابقة .. واضح إن كريم أو جل كانوا على يدج وقت ما حطيتها على السكانر ..
فتحت الجواز .. لقيت ختم 6 شهور إقامة على الكرت ..
خذت الجواز بهدوء .. ومشيت لصالة الشنط .. وكانوا أهلي ينتظروني ومعاهم الشنط ..
نصيحة مخلصة :: لحد يحط على يده كريم أو عطر قبل ما يدخل أي مطار من مطارات أمريكا ..

** ** **
يوم وصولنا كان جمعة ودرجة الحرارة 13 مئوية .. وصلنا الفندق وريحنا ونزلنا نتمشى ونتعشى ..
ورجعنا الفندق .. يوم ثاني قلنا بنروح السوق ..
طلعنا من الفندق .. ولا ذاك البرد .. درجة الحرارة كانت -2 مئوية ..
وليلتها نزل ثلج ونزلت درجة الحرارة إلى -8 مئوية ..


كانت سفرة خفيفة لطيفة .. رحت للطبيب .. وإطمانيت على نفسي ..
ورحت السوق .. وتمشيت .. واستانست

تحياتي

بنت سيف

21/3/2011

دوحة - نيويورك - دوحة

ساعات احط في مدونتي .. سوالف مرت علي أو أنا جزء منها .. علشان ما أنساها

هذي وحدة منها .. ما بغيت الأيام تطويها وأنساها

في بداية الشهر الحالي .. رحت أنا والأهل لنيويورك لمدة أسبوعين ..

عادة أسافر لواشنطن دي سي .. ولأني من زمان ما رحت نيويورك .. رزيت ويهي ورحت معاهم ..
تغيرت نيويورك .. لفت نظري منظر نيويورك وهي عارية ..

الكم مرة اللي رحتهم هناك كانت الدنيا صيف والأشجار عليها ورق والحدائق خضرة ..

بس هالمرة الورق طايح والشجر واقف بهياكل بنية .. وكان نازل ثلج ..

فأصبحت المقارنة حادة بين البني والأبيض ..
في الطريج من المطار للفندق مرينا على ثلاثة مقابر يغطيها الثلج .. وشكلها فوضى ..

عمري ما انتبهت لها من قبل لأن الشجر بأوراقه يغطيها ..
طبعا سكنا في منهاتن .. في فندق انتركونتنتال باركلي في الشارع 48 ..

وهاذي قصة بروحها ..
مكانه استراتيجي .. قريب من الفيفث افينيو وماديسون افينيو وبارك افينيو ..

ومع إن الحرارة في هالأسبوعين كانت بين 2-8 درجة مئوية ..

إلا إن كمية المشي اللي سويناها .. كانت كبيرة .. وحلوة ..

وبعد كمية الثياب اللي علي غيرمريحة وكثيرة ما تم شي ما لبسته علشان اتدفى ..
بين الشوارع .. كان في تحديث الألمانيومي للعربانات اللي تبيع سندويشات ..

وأغلب الواقفين يبيعون عرب .. وصور السندويشات عبارة عن فلافل وشاورما ..

ومعلقة يافطة "حلال" .. (حسيت بالانتشار الإسلامي اللي أسعدني جداً)

والحقيقة شفت في هالمنقطة في كل زاوية شارع تقريبا واحدة منها يا يبيعون فاكهة أو سندويشات أو تي شيرتات

..
طبعاً تسوقنا ورحنا مطاعم وغيرنا جو ..

لكن فندقنا هو القصة .. ماخذين غرفتين مفتوحتين على بعض ..

المبنى قديم والحمامات ضيقة بجد ..

وبعد مو مشكلة .. غرفتي الليتات فيها .. عجيبة ..

إذا طيفت الليت .. تنطفي كل أنوار الحجرة وما اقدر افتح ليت الأباجورة شي يحر بجد ..

كلمت إدارة الفندق .. قالوا .. هذي الحجرة بالذات .. لازم نكسر الحائط علشان .. نصلح وصلات الكهرباء ..

طيب ليش سكنتونا فيها .. كان حطيتونا في غرف ثانية ..

قالوا يوم نزلتوا ما كان في غرف مفتوحة على بعض إلا هالغرفتين .. الحين موجود ..

وممكن نغير غرفكم .. بس ما رضينا ما نبغي نسكر شنط ونفتح شنط ..

المأساة الثانية في الفندق .. مافيه "روم سيرفس" بين 12 الظهر لحد 5 مساءً .. ليش مب فاهمة ..

الفندق موقعه جيد .. بس .. الباقي .. لكم عليه وايد .. لحد يروح له ..
طبعا كنا فكرنا نتتقل لفندق ثاني أحسن من نغير الغرف ..

بس ما قدرنا لأن الفنادق مشغولة بسبب مؤتمر في الأمم المتحدة حضر له تقريبا 7000 شخص من جميع أنحاء العالم ..
..

زرنا عدة أماكن في نيو يورك مثل متحف المتروبوليتان وتايم سكوير ..

بغيت نروح مسرحيات .. بس كانت كلها قديمة وشايفنها ..
طبعا صورت .. كثير وفي كل مكان رحنا له في نيويورك ..
آخر موقف .. في مطار جيه إف كيه "كيندي" ..

كان يوم رجعتنا يوم ماطر بشدة وريح قوية ..

ووصلنا المطار .. ووزنا وخذنا بطاقات الصعود للطائرة ..

لكن بسبب الريح الشديدة .. حركة الطيران توقفت تماماً في المطار .. بسبب الجو العاصف ..

وتأخر إقلاع طيارتنا "القطرية" 4 ساعات في حين الغيت رحلات الإماراتية والاتحاد ..

وأول ما فتح المطار .. كنا في طريقنا للدوحة .. الرحلة كانت مريحة جداً ..
It's good to be home

بنت سيف

25/3/2010

العمرة ..

في الأسبوع الماضي رحنا العمرة .. مع الأهل لمدة أسبوع

والحمدلله كان الجو حلو والمكان جميل وزحمة .. ما توقعتها في هذا الوقت من السنة

شدهتني مناظر كثيرة داخل الحرم المكي .. مع العلم أني رحت العمرة كثير من قبل والحج ولله الحمد .. لكن الغريب إني كل مرة اتعلم شيء جديد ..

أكثر شيء شد انتباهي وتيرة سير المصلين في الطواف والسعي ..

وكذلك عند الآذان .. كيف يتدفق الناس للدخول في الحرم ..

الصورة التالية .. تبين الناس وهم في طريقهم للحرم لأداء صلاة الظهر .. عند باب الملك فهد ..

** ** **

والأهل .. هناك ما قصروا .. قاموا بالواجب وأكثر .. وهذي قصيدة كتبتها لهم في آخر يوم أشكرهم فيها على كل اللي سووه معانا ..

شكر وعرفان

واش جزا المعروف غير الشكران
وردود أفعال جميلة ..
لناس من غير هذا الزمان ..
قربهم وحبهم غنيمة ..
جمعوا ولمة من غير حسبان
بصدق نية وعزيمة ..
ركزوا همهم في خدمة الإخوان
وبينوا الود في صميمه ..
بسيطة كلماتي بس جد هي عرفان
لمشاعر في قلبي حميمة ..
تعبير لتقدير في جوف انسان
يحترم هداياكم الثمينة ..
عجيب كرمك يابو فلان ..
أنت الأصل في شميمة ..
كريمة ضيافتج يا أم فلان
أنتي للطيبة تميمة ..
الكلام فيكم ما هو بهتان
والكلام عنكم ماهو نميمة ..
قالت عنهم فلانة بنت فلان
وهي للحق دوم لزيمة ..

بنت سيف

عزيزة نفس ..

11/4/2009