لا تقاطع .. كلام الآخرين ..

لا تقاطع .. كلام الآخرين

كان عندي عادة .. مب حلوة أبداً ..

لما يتكلم الغير في حوار معاي .. يصير ما فيني صبر .. أرد واتكلم وأقاطع كلامه .. وأكيد أسبب له نوع من الحرّة الداخلية ..

واكتشفت إني لازم .. أغير هالطبع السيء .. واتعلم أدب الاستماع للغير وهم يتكلمون ..

ليش لازم أغير هالطبع ؟؟

لعدة أسباب ..

أولا .. أدبياً مب حلوة الواحد يقاطع كلام غيره .. وشخصيا احتر لما حد يسوي فيني جذيه .. إذن أكيد هم بعد يحترّون ويعصبون ..

بس هالطبع .. فيني مب من باب قلة الاحترام للغير

لكن من باب قلة الصبر والطاقة الزايدة .. لأني أبغي أعبر عن كل شي في راسي قبل لا يطير ..

وثانيا .. اكتشفت .. إني لما اسوي جذيه .. ترى أنا ما سمعت إيش الطرف الثاني قاعد يقول .. ولا فهمت كلامه .. وبديت أعلّم نفسي .. الصبر .. وفن الاستماع للغير ..

وتعلمت افهم اللي يقولون .. واحترمه ..

تدرون لما الواحد يقاطع كلام الآخرين .. ممكن يعصّبه .. لأن يقطع أفكاره اللي يبغي يقولها ..

زين .. كيف تعاملت مع هالمشكلة ..؟

اقولكم شسويت ..

ركزت على متى أقاطع كلام الآخرين .. وأول ما تجيني الحالة .. أحاول (بصعوبة في البداية ) إني انتظر الغير يخلص كلامه أول .. وفعلا سويت جذيه ..

وجاء الاكتشاف الجديد .. إني صرت اسمع ايش يقولون واركز فيه .. وصار الحوار مريح ومتواصل .. وصرت أكثر مرتاحة في الكلام .. بمعنى غير مشدودة .. ومركزة ..

وبس

4/7/2008

نور العيسى