حركات .. منغّصة

حركات .. منغّصة ..
الحركة الأولى ..

باطة جبدي .. النظارة السوداء .. !!
يعني كثرتها زادت .. عن الحد المعقول .. في النهار فهمنا ..
في الليل ليش؟؟
ليش البنات يلبسون النظارة السوداء في الأماكن المغلقة ..
وليش يحطونها فوق الشيلة .. أو الحجاب ..
أكيد وجاهه اجتماعية .. تعالوا شوفوا ماركة النظارة ..
الغريب .. في المجمعات التجارية .. كل البنات (تقريبا) لازم النظارة السوداء لها دور معاهم ..
هل يغطون العيون اللي ما فيها كحل ولا ميك آب ..؟
ولا علشان يناظرون فيها بدون .. محد يدري وين يطالعون ؟
ما أحط في ذمتي .. بس إنها قاهرتني .. ما أدري ليش ..
لا .. سؤال ثاني بعد ..
ليش الشبا ب .. ما يلبسون نظارات سودة ؟
هم يلبسون .. بس مب مكثرين منها .. مثل البنات

** **

الحركة الثانية ..

شوارعنا ..
خلاص .. تعبنا .. ياجماعة .. ما يصير التعديلات .. تاخذ سنين
والشارع لا جهز .. تجيك كل مصلحة بدورها .. تكسر فيه من أول وجديد
إلا كيبل التلفون ما ركب
ولا مواسير الصرف الصحي نسوها ..
ولا الكهرباء .. تسوي إضافات
وين التخطيط .. ما كان من الأول .. كل المصالح تسوي شغلها ..
مب كل شوي تكسير وتعطيل
على حساب .. راحتنا ومصالحنا ..
طبعاً .. وبدون شك .. فيه ناس مستفيدة جداً
وفي المقابل .. ناس متضررة جداً
ما أدري ليش أحس إن مسلسل " ديوان السبيل" لعبد الحسين عبدالرضا
مسويينه علينا ..
معاناة السواقة والزحمة اليومية غير طبيعية ومرهقة
صار الواحد لو عنده موعد لازم يطلع قبل بساعتين ..
وإذا كان كفو .. يقضي مصلحتين في يوم واحد ..
ولا عادة هي مصلحة .. واحدة .. وبعد ما تخلص في نفس اليوم ..

** **

الحركة الثالثة ..

الجيران والسكن ..
صحيح .. الإسلام وصى على الجيران ..
لكن فيه شي .. صار غير محتمل ..
البيت الواحد بسبب غلاء الأسعار .. يسكنونه .. عدة عوائل ..غير مواطنة
وقلة الذوق .. صارت أمر عادي ..
المشكلة في الشارع .. وسيارات الجيران اللامحدودة العدد
كل من يصف مكان ما يريحه ..
والباقي ما يشوفو شر ..
شي ممكن اتقبله ..
لكن إنه يصفون على مدخل الطبيله (الجراج) ..
ولا من دخل بيته .. ولا من طلع منه .. منتهى قلة الذوق .. والأدب

** **

الحركة الرابعة ..

الموبايلات .. أمر عادي وطبيعي .. ومقبول ..
كل من شايل موبايل أو اثنين أو حتى ثلاثة ويمشي .. عادي ..
فهمنا .. الحياة ومتطلباتها ..
هذا للكبار ..
لكن اليهال ..
طبعاً .. محد كفو اليوم ما يجيب لعياله موبايلات ..
لأسبا ب معقولة ومطلوبة ..
وبعد لأسباب غير معقولة ولا مطلوبة ..
المهم .. افهم ..
ليش اليهال .. يبغون أكثر من رقم وأكثر من موبايل ؟؟
لا ولازم يكون رقم مميز ..؟؟
والفسق الصجي عاد ..
لما ينزل موديل جديد .. من الموبايلات .. ويصر الياهل ..
إن يكون عنده هالموديل .. اللي هو بسعر غير بسيط ..
لزوم وجاهة الياهل الاجتماعية .. !!!

** **

الحركة الأخيرة ..

السرعة المحددة في بعض الشوارع ..
ودي أعرف .. ما معيار تحديدها ..
شارع السرعة فيه 60 وغيره 80 وغيره
100 كيلومتر في الساعة ..
اكتشفت إن كل ما قلت السرعة المسموح بها في شارع ما ..
كل ما زاد التعطيل والنطرة في الزحمة ؟؟
يعني النظام المروري .. اختلق لنا زحمة صناعية ..
بدون مبرر ..
شوفوا الشوارع .. وشوفوا اللي يصير من الزحمة ..
بسبب السرعة القصوى .. في الشارع
الكل خايف من المخالفات والنقاط ..
والنتيجة تأخير جماعي

عزيزة نفس
نور العيسى

23/10/2008